Mipalawom pa karon sa lawom nga imbestigasyon sa Regional Intelligence Division 7 sa Police Regional Office (PRO) 7 bahin sa pagkasikop sa usa ka drug courier nga taga Metro Manila nga nakuhaan og kapin sa usa ka kilo nga gituohang shabu niadtong Abril 10, 2024.
Si Stephen Flaviano Solina, 46, taga San Mateo, Rizal, nakuhaan og P11,050,000 nga balor sa illegal nga drugas atol sa gilusad nga buy-bust sa Brgy. Jugan sa lungsod sa Consolacion sa miaging semana.
Unang mibutyag si Solina nga igo lang siya nga gisugo nga dalhon ang supply sa illegal nga drugas sa Sugbo ug magpaabot lang sa tawag kon kinsa ang hatagan niini.
Ang nakapakurat nga gibutyag niini mao nga makalima na diay ka higayon nga nag-deliver si Solina diin kinilo nga gituohang shabu ang malampuson nga nahatod sa iyang kontak.
Matod ni Police Lieutenant Colonel Gerard Ace Pelare, spokesperson ni Police Brogadier General Anthony Aberin, hepe sa PRO 7, nga tanang dakop ilang gipaubos sa imbestigasyon sanglit mao kini ang mando sa ilang labaw.
Usa sa angayan masayran kon diin gikan ang supply sa illegal nga drugas ug kinsa usab ang ilang kontak sa Central Visayas nga maoy sunod nga target sa follow up operation.
Giangkon ni Pelare nga kon magsige og kadakpan ang mga drug courier, mohimo usab og laing pamaagi ang mga drug supplier pinaagi sa pag-update sa ilang estratehiya, apan matod niya, dili sila mohunong sa pag-analyze kon unsa na usab nga mga pamaagi nga ilang himuon. / AYB