Gironda sa mga sakop sa Philippine Drug Enforcement Agency (PDEA) 7 ang usa ka balay suyopanan sa Sitio Upper Bonbonan, Barangay Labangon, dakbayan sa Sugbo, alas 6:30 sa gabii, Dominggo, Agusto 11, 2024 nga niresulta sa pagkasikop sa tulo ka mga tawo apil na niini ang nagdumala sa drug den.
Ang mga nadakpan giila nga silang Randy Superada alyas Waray, 40, habalhabal driver, nga target sa PDEA-7.
Lakip sa nadakpan ang mga naatlan sa sulod sa drug den nga silang Joshua Ortega, 21, ug Jennifer Limjap, 44, usa ka caregiver.
Nasakmit sa mga operatiba sa PDEA 7 ug sa Labangon Police Station 10 ang pito ka pakete sa gituohang shabu nga dunay estimated market value nga P74,800 ug mga putos nga dunay traces sa shabu lakip na mga drug paraphernalia.
Matod ni Leia Alcantara, information officer sa PDEA 7, nga duha ka semana nila nga gipaubos sa case buildup ang maong drug den human maka dawat og impormasyon gikan sa kasaligang tinubdan.
Giingong makabaligya si Waray og 10 gramos matag semana ug ang iyang kasagaran nga mga customer mao ang mga habal-habal drivers ug iyang mga kaila sa lugar.
Kalapasan sa pagpayuhot sa illegal nga drugas ang ipasaka sa PDEA 7 ug ang pagdumala sa drug den nga way gitugot nga pyansa ang korte alang sa suspetsado sanglit giila ang drug den nga breeding ground sa mga kriminal nga nakahatag og peligro sa siguridad sa komunidad. / AYB