Malampuson nga gipuhag sa Philippine Drug Enforcement Agency-Bohol Police Provincial Office (PDEA-BPPO) uban sa mga sakop sa Tagbilaran City Police Station ang usa ka drug den nga nahimutang sa Purok 6, Barangay PoblaciĆ³n III, Dakbayan sa Tagbilaran, Bohol, alas 7:55 sa gabii, Martes, Oktubre 8, 2024, nga niresulta sa pagkasikop sa tulo ka mga tawo.
Ang mga nadakpan giila nga silang Mark Joseph Geniston, 42, nga giilang drug den maintainer nga mao usab ang caretaker sa boarding house nga target sa operation sa kapulisan.
Lakip sa nadakpan ang duha sud sa drug den nga sila si Arnold Janssen Fabiosa, 38, caregiver, ug Brendon Oncog, 19, truck boy/helper.
Nasakmit sa mga operatiba ang pito ka putos sa gituohang shabu nga dunay gibug-aton nga 15 gramos nga dunay estimated average market value nga P102,000, tulo ka cellular phone ug mga drug paraphernalia.
Matod ni Leia Alcantara, information officer sa PDEA 7, nga usa ka semana nga gipaubos sa case buildup ang ilang target nga si Geniston human madawat ang impormasyon gikan sa kasaligang tinubdan.
Sa nakuha nga kasayuran nga makabaligya kini og 5-10 gramos matag semana gikan sa iyang supplier.
Siya ang caretaker sa boarding house sa iyang iyaan ug ang iyang kwarto maoy gihimong suyopanan.
Ang mga suspek gikatakda nga pasakaan og tukmang kaso. / AYB