Usa ka drug den nga nahimutang sa Sitio Tabay Lawum, Barangay Tisa, Siyudad sa Sugbo ang gibungkag sa mga sakop sa Philippine Drug Enforcement Agency (PDEA) 7 uban sa Regional Intelligence Unit sa Police Regional Office (PRO) 7, alas 6:25 sa hapon, Sabado, Agusto 24, 2024, nga niresulta sa pagkasikop sa tulo ka mga tawo.
Nadakpan sa buy-bust ang ilang target nga mao usab ang nagpadagan sa balay suyopanan nga giila nga sila si Jano Rupal alyas Gino, 42, nagmintinar sa suyopanan; George Baena, 43, masahista; ug Lloyd Alex Alona, 38, drayber sa habalhabal.
Nasakmit sa mga sakop sa PDEA 7 ug PRO 7 ang 18 ka pakete sa gituohang shabu nga motimbang sa 16 gramos nga dunay estimated average market value P108,800 ug ang mga drug paraphernalia.
Ang maong mga ebidensya gi-turnover na sa buhatan sa PDEA 7 alang sa himuon nga chemical analysis.
Matod ni Leia Alcantara, information officer sa PDEA 7, usa ka buwan nila nga gipaubos sa case buildup si Rupal human nila madawat ang kasayuran nga nagpadagan kinig suyopanan ug siya usab ang mamaligya sa illegal nga drugas.
Giingong makabaligya ang suspetsado og 15 ngadto sa 20 gramos sa illegal nga drugas matag semana gikan sa iyang supplier.
Mag-atubang og daghang kaso si Rupal sama sa drug pushing, pagpadagan og balay suyopanan ug paghupot og illegal nga drugas.
Ang tulo pasakaan og kaso subay sa salaod nga ilang nahimo. / AYB