Gironda sa mga sakop sa Philippine Drug Enforcement Agency (PDEA) -Lapu-Lapu City Team uban sa mga personnel sa PNP Regional Intelligence Unit 7 ug kapulisan sa Station 3 sa Dakbayan sa Lapu-Lapu ang usa ka drug den sa Zone Lato, Barangay Kalawisan niadtong Miyerkules, Hulyo 17, 2024, diin upat ka mga tawo ang nasikop.
Nadakpan ang target sa PDEA nga mao usab ang nagpadagan sa drug den nga giila nga si Macvie Cabalhug, 34, lakip na ang iyang kauban nga si Montano Alarde, 35.
Napusasan sad ang duha nga naatlan sa sulod nga naghingos sa ilegal nga drugas nga sila si James Kingsley Apcala, 34, ug Anthony Toring, 31.
Nasakmit sa mga operatiba ang 12 ka mga pakete sa gituohang shabu nga motimbang og 12 gramos nga dunay estimated average market value nga P81,600.
Matod ni Leia Alcantara, information officer sa PDEA 7, nga tulo ka semana nga gipaubos sa case build up ang drug den human madawat ang kasayuran gikan sa concerned citizen sa dapit.
Giingong makabaligya si Cabalhug og 10-15 gramos sa ilegal nga drugas matag semana.
Kalapasan sa RA 9165 o Comprehensive Dangerous Drugs Act of 2002 ang ipasaka sa PDEA 7 batok sa mga suspek. / AYB