Magtiayon nasikop sa gihimong buy-bust sa mga sakop sa Philippine Drug Enforcement Agency (PDEA) 7-Regional Special Enforcement Team sa pakig-alayon sa PNP Drug Enforcement Group ug Cebu City Police Office alas 4:44 sa hapon, Miyerkules, Hulyo 30, 2025 sa Sitio Ulap, Barangay Basak Pardo, Dakbayan sa Sugbo.
Ang mga nasikop giila sa PDEA-7 Regional Director III Joel Plaza nga silang alyas Mirriam, 37, ug ang bana nga kakunsabo niya sa ilegal nga kalihukan nga si alyas Jerry, 36, nga pulos nagpuyo sa maong lugar.
Lakip sa nadakpan ang construction worker nga si alyas Reil, 49, residente sa Barangay Dawis Sur, Lungsod sa Carmen nga naatlan nga nagsuyop og shabu sa sulod sa drug den.
Nasakmit sa mga operatiba ang mga pinakete sa gituohang shabu nga motimbang sa 15 gramos nga dunay balor nga P102,000. / AYB