Mag-live in partner nga nagdumala sa usa ka balay nga gihimo’ng drug den nasikop uban sa laing duha atol sa buy-bust kapulisan sa Sitio Plaza, Barangay Apas, dakbayan sa Sugbo sa alas 5:30 sa hapon sa Miyerkules, Marso 20, 2024.
Ang mga suspek giila nga sila si Jonathan Roca, 44, ug iyang kapuyo nga si Jovelyn Cajutay, 41, pulos walay trabaho.
Lakip sa nadakpan ang duha ka mga lalaki nga sila si Jerome Moral, 41, ug Ahmed Romo, 44, mga drayber sa habalhabal.
Nasakmit sa mga operatiba ang unom ka mga pakete sa gituohang shabu nga motimbang og 16 gramos nga dunay estimated average market value nga P108,800 marked money ug mga drug paraphernalia.
Nilusad sa operasyon mao ang mga sakop sa Philippine Drug Enforcement Agency (PDEA 7) uban sa Regional Intelligence Unit.
Matod ni Leia Alcantara, information officer sa PDEA 7, nga nakadawat sila’g report gikan sa usa ka concerned citizen labot sa gipadagan nga drug den.
Tungod niini, ilang gipaubos sa duha ka semana nga case build up ug nasuta nga tinuod, ilang gilusad ang buy-bust.
Dugang ni Alcantara, makabaligya ang mag-live in partner og 30 ngadto sa 50 gramos matag semana, kasagaran nga kustomer mga call center agent ug habalhabal drivers. / AYB