Drug den nga nahimutang sa Barangay Basak San Nicolas, dakbayan sa Sugbo gibungkag sa mga sakop sa Philippine Drug Enforcement Agency (PDEA 7) ug Regional Special Enforcement Team alas 10:32 sa Biyernes sa gabii, Abril 26, 2024, nga niresulta sa pagkasikop sa tulo ka mga tawo.
Lakip sa nadakpan ang target sa operation nga maoy giingon nga nagpadagan sa drug den nga giila nga si Alvin Z. Flores, 40, ug sila si Angelo Bulao, 21, ug Permolio Haincadto 39, pulos mga walay trabaho.
Nasakmit sa PDEA 7 operatives ang upat ka putos sa gituohang shabu nga motimbang og 12 gramos nga dunay estimated market value nga P81,600 ug mga drug paraphernalia.
Matod ni Leia Alcantara, information officer sa PDEA 7, nga duha ka buwan nga gipaubos sa case buildup ang maong drug den human nila nadawat ang kasayuran gikan sa usa ka concerned citizen.
Giingong makabaligya si Flores og 20-30 gramos sa gituohang shabu matag semana.
Sa nakuha nga kasayuran, dugang ni Alcantara, nga nabilanggo na sa miaging tuig si Flores human niini pasakiti ang iyang inahan nga naangol sa ulo.
Kalapasan sa Section 5,6,7, 11 ug 12 sa Article II sa Republic Act 9165 kun Comprehensive Dangerous Drugs Act of 2002 ang atubangon nga kaso sa mga suspek. / AYB