Laing drug den sa lalawigan sa Bohol ang napuhag sa awtoridad sa Purok 7, Brgy. Mocpoc Sur, lungsod sa Loon, alas 3:52 sa hapon, Martes, Oktubre 1, 2024, nga niresulta sa pagkasikop sa tulo ka mga suspek.
Ang mga nadakpan giila nga silang Paulito Aparece alyas Botyok, 44, delivery boy, nga target sa buy-bust ug mao usab ang drug den maintainer ug laing duha sud sa drug den nga silang Angelo Toso, ug iyang pag-umangkon nga si Joemark Toso, 27, pulos mga delivery boy.
Nilusad sa malampsuong operasyon mao ang mga sakop sa Philippine Drug Enforcement Agency (PDEA) Bohol Provincial Office uban sa Bohol Maritime Police, Loon Municipal Police Station ug Coast Guard Intelligence Unit-Bohol.
Nasakmit sa mga operatiba ang 9 ka mga putos sa gituohang shabu nga motimbang sa 12 gramos nga dunay estimated average market value nga P81,600 lakip na ang buy-bust money ug ang tulo ka cellphones ug nagkalainlaing drug paraphernalia.
Matod ni Leia Alcantara, information officer sa PDEA 7, nga duha ka semana nila gipaubos sa case buildup ang maong drug den human makadawat og inpormasyon gikan sa kasaligang tinubdan.
Kalapasan sa Sections 5, 6, 7, 11, ug 12, Article II sa Republic Act 9165 o Comprehensive Dangerous Drugs Act of 2002 ang giandam nga kaso nga ipasaka sa PDEA 7 batok sa mga suspek. / AYB