GIRONDA sa mga sakop sa Philippine Drug Enforcement Agency (PDEA)-Lapu-Lapu City Team uban sa Station 3 sa Lapu-Lapu City Police Office (LCPO) ang usa ka drug den nga nahimutang sa Humay-Humay Road, Barangay Pajo nga niresulta sa pagkasikop sa upat ka tawo lakip na ang drug den maintainer alas 10:00 sa gabii, Martes, Hulyo 1, 2025.
Nadakpan ang target sa operation nga mao sab ang nagpadagan sa drug den nga si alyas John 38, usa ka construction worker nga residente ra sab sa maong lugar.
Lakip sa nadakpan ang tulo ka tawo nga naatlan sa sulod sa drug den nga silang alyas Gene, 45, welder, alyas Christian, 28, construction worker ug alyas Ali, 25, usa ka vendor nga pulos nag puyo sa maong dapit.
Nasakmit sa mga operatiba ang unom ka pakete sa gituohang shabu nga motimbang sa 10 gramos nga dunay estimated average market value nga P68,000,00 lakip na ang mga drug paraphernalia.
Matod ni Leia Alcantara information officer sa PDEA 7 nga usa ka semana nila nga gipaubos sa case buildup ang maong drug den human nila makuha ang impormasyon gikan sa usa ka kasaligang tinubdan.
Human makuha ang tanang kasayuran, gilusad dayon ang anti-illegal drug operation sa pakig-alayon sa station 3 .
Ang mga nakuha nga ebidensya giduso na sa PDEA 7 Regional Office Laboratory alang sa chemical analysis ug proper disposition. / AYB