Tulo ka mga tawo ang nasikop human gironda ang usa ka drug den sa mga sakop sa Philippine Drug Enforcement Agency (PDEA) 7-Regional Special Enforcement Team (RSET), uban sa PNP Regional Intelligence Unit 7 ug Cebu City Police Office sa Sityo Mahayahay II, Barangay Calamba, Dakbayan sa Sugbo sa 1:59 sa kaadlawon, Lunes, Abril 8, 2025.
Si PDEA7 acting regional director Alex Tablate niila sa dinakpan nga si alyas
Kenneth, 36, subject sa operasyon mao sab ang drug den maintainer.
Lakip nga nadakpan si alyas Christian, 20, trabahante ni Kenneth, pulos mga residente sa maong lugar.
Nadakpan sab si Jeffrey, 44, taxi driver, taga Barangay Kamputhaw, Cebu City.
Nakuha ang unom ka pakete adunay gituohang shabu nga motimbang sa 11 gramos, gibanabana nga mokantidad ngadto sa P74,800 ug mga gamit sa paghingos og shabu.
Matod ni Leia Alcantara, information officer sa PDEA7 nga duha ka semana nila nga gipaubos sa case buildup ang ilang subject human madawat ang kasayuran gikan sa usa ka confidential informant.
Nasayran nga makabaligya si alyas Kenneth og 20 ngadto sa 50 gramos nga shabu matag semana.
Ang mga nakuha’ng ebidensya giduso sa PDEA 7 Regional Office Laboratory alang sa chemical analysis alang sa proper disposition.
“Drug dens are breeding grounds for violence and criminality and disrupt the peace and order in the community.” matod ni Alcantara. / AYB