Tulo ka tawo ang naposasan human gironda sa Philippine Drug Enforcement Agency (PDEA) - Negros Oriental Provincial Office (NOPPO) uban sa Regional Intelligence Unit ug kapulisan sa Negros Oriental ang usa ka drug den nga nahimutang sa Zone 2, Barangay Lo-oc, Dakbayan sa Dumaguete, alas 3:15 sa hapon, Martes, Septiyembre 3, 2024.
Lakip sa nadakpan ang target sa operation nga mao usab ang den maintainer nga si Joeson Aguilar, 29, ug ang duha ka tawo nga naatlan nga naa sa sulod nga sila si John Michael Maribao, 26, promodizer ug Junard Maribao, 27.
Nasakmit sa mga operatiba ang 6 ka pakete sa shabu nga motimbang sa 6 gramos nga dunay estimated average market value nga P40,800 lakip sa buy-bust money ug nagkadaiyang drug paraphernalia.
Matod ni Leia Alcantara, information officer sa PDEA 7, nga tulo ka semana nila nga gipaubos sa case build up ang maong drug den human makakuhag kasayuran gikan sa usa ka kasaligang tinubdan.
Giingong makabaligya ang suspetsado nga si Aguilar og 20 gramos matag semana diin ang mamalit diha ra gamiton sa drug den.
Si Aguilar nadakpan na niadtong 2020 sa kalapasan sa Section 5 sa Republic Act 9165 o Comprehensive Dangerous Drugs Act of 2002 ug nakagawas kini pagka 2021 pinaagi sa plea bargaining.
Ang kapulisan sa Central Visayas (CV) gimandoan sa pagpadayon sa hugot nga kampanya batok sa gidiling drugas, diin gikonsiderar na sa pagkakaron nga -hulga sa nasudnong seguridad. / AYB