MALAMPUSON nga nabungkag sa mga sakop sa Philippine Drug Enforcement Agency (PDEA) 7 - Regional Special Enforcement Team uban sa PNP Drug Enforcement Group 7 ang drug den nga nahimutang sa Sitio Bon-ami, Barangay Labangon , Siyudad sa Sugbo alas 4:50 sa hapon, Hulyo 2, 2025.
Atol sa buy-bust nadakpan ang tulo ka mga tawo, usa niini ang target nga maoy nagpadagan sa drug den nga si alyas Johnric, 34, construction worker nga nagpuyo ra sab sa maong lugar.
Lakip sa nadakpan ang duha ka lalaki nga naatlan nga naghingos og shabu sa sulod sa drug den nga sila si alyas Kenjie, 20, tinun-an sa highschool ug alyas Lee, 40, construction worker, pulos taga Labangon . Nasakmit sa mga operatiba ang 11 ka pakete sa gituohang shabu nga motimbang og 35 gramos ug mobalor sa P238,000. / AYB