Gitumbok nga drug den gironda sa mga sakop sa Philippine Drug Enforcement Agency (PDEA) 7 Lapu-Lapu City Team uban sa Lapu-Lapu City Police Office Station 3 sa Purok Mahogany, Barangay Poblacion alas 8:30 sa gabii, Lunes, Agusto 4, 2025.
Kini nisangpot sa pagkasikop sa upat ka tawo.
Si PDEA 7 Regional Director Joel Plaza niila sa ilang target sa operation nga si alyas Marilou, 41, tag-iya sa panimalay nga gihimong drug den ug alyas Robert, 25, drug personality nga taga Barangay Mantuyong , Siyudad sa Mandaue.
Lakip sa nasikop ang duha ka lalaki nga naatlan sa sulod sa drug den nga naghingos og shabu nga silang alyas Jophel, 26, market boy ug alyas Wilson, 23, pulos taga Poblacion, Lapu-Lapu City.
Nasakmit sa PDEA 7 operatives ang 15 ka pakete sa gituohang shabu nga motimbang sa 10 gramos nga dunay kantidad nga P68,000.
Lakip sa nasakmit ang buy-bust money, cash nga gituohang halin sa ilegal nga drugas, ug nagkalainlaing drug paraphernalia. Giingong makabaligya si Marilou ug Robert og 50 gramos nga shabu matag semana sa ilang drug den. / AYB