Sikop ang mag-live-in partner nga giingong nagpadagan og drug den sa Sitio Everlasting, Barangay Pahina San Nicolas , Siyudad sa Sugbo dihang gironda pinaagi sa buy-bust sa mga sakop sa Philippine Drug Enforcement Agency (PDEA) 7 uban sa Cebu City Police Office ala 1:35 sa hapon, Biyernes, Hulyo 25, 2025 .
Ang director sa PDEA 7 nga si Joel Plaza niila sa ilang target sa operation nga mao usab ang nagpadagan sa drug den nga silang Alyas Marjun, 55, ug ang kaipon niini nga si alyas Mabel, 25, fish vendor nga nagpuyo ra usab sa maong dapit.
Lakip sa nadakpan ang duha nga naabtan sa mga ahente sa PDEA sa sulod sa balay suyopanan nga mao silang alyas Marlon, 46, karkador sa mercado, taga Barangay Inayawan ug alyas Archer, 47, sewage cleaner, taga Barangay San Nicolas proper.
Nakuha sa mga operatiba ang unom ka pakete sa gituohang shabu nga motimbang sa 10.12 gramos nga dunay balor nga P68,160.00 ug kwarta nga moabot sa P300 nga kita sa ilang ilegal nga negosyo.
Giingong makabaligya kini og 15 gramos matag semana sa ilang customer nga kasagaran kargador sa mercado. / AYB