Gironda sa Philippine Drug Enforcement Agency (PDEA) 7 uban sa kapulisan sa Dakbayan sa Sugbo ang usa ka drug den nga nahimutang sa Magsaysay street, Barangay Pasil, Siyudad sa Sugbo ala 1:15 sa hapon, Lunes, Hunyo 9, 2025, nga niresulta sa pagkasikop sa lima ka mga tawo.
Lakip sa nadakpan ang target sa operation nga maoy nagpadagan sa drug den nga giila nga si alyas Elcid, 45, nga residente sa maong lugar.
Upat ka tawo ang naatlan nga naghingos og shabu sulod sa drug den nga silang alyas Amado, 50, taga Basak Lapu-Lapu City, alyas Junrey, 40, ug ang magsuon nga silang alyas Evelyn, 42, ug Erwin, 45, bookkeeper nga pulos taga Cambaro, Siyudad sa Mandaue.
Nakuha sa mga operatiba ang 17 ka pakete sa gituohang shabu nga motimbang sa 16 gramos nga dunay estimated average market value nga P108,800 lakip na ang mga drug paraphernalia nga dunay traces sa shabu.
Matod ni Leia Alcantara information officer sa PDEA 7 nga duha ka semana nila nga gipaubos sa case buildup ang maong drug den human nila madawat ang kasayuran gikan usa ka concerned citizen nga molupyo sa lugar.
Giingong makabaligya si alyas Elcid og 15 ngadto sa 30 gramos nga shabu matag semana gikan sa iyang supplier.
Ang mga nakuhang ebidensya giduso sa PDEA7 Regional Office Laboratory alang sa chemical analysis samtang giandam na ang kasong kalapasan sa Section 5,6,7,11 ug 12 Article II Republic Act 9165 nga ang ipasaka batok sa maong mga suspek. / AYB