Gironda sa mga sakop sa Philippine Drug Enforcement Agency (PDEA) Negros Oriental Provincial Office ang usa ka balay sa Purok Ipil, Barangay Tubtubon, lungsod sa Sibulan, Negros Oriental nga gihimo nga suyopanan alas 12:36 sa Biyernes sa udto, Nobiyembre 10, 2023.
Duha ka mga tawo ang nasikop.
Ang target sa operation mao si Raynen Ablay, 49, kinsa nadakpan sa mga operatiba samtang nakaikyas ang iyang igsuon nga si Terence George Ablay.
Lakip sa nadakpan si Jesse Ian Deciar, 44, empleyado sa Department of Agriculture (DA).
Nakuha sa PDEA ang unom ka pakete sa gituohang shabu nga motimbang og 16 gramos nga dunay balor nga P108,800.
Matod ni Leia Alcantara, information officer sa PDEA 7, nga ilang nadawat ang kasayuran gikan sa komunidad diin ila dayon nga gipaubos sa case build up.
Giingong makabaligya si Ablay og 10 gramos matag semana. Ang mogamit sa shabu sa sulod sa iyang balay pabayron og P50 matag usa.