Tulo ka tawo ang nadakpan sa gilusad nga anti-illegal drug operation sa Philippine Drug Enforcement Agency (PDEA)-Bohol Provincial Office sa pag-abag sa Tagbilaran City Police Station ug Bohol Maritime Police sa Purok 6, Barangay Booy, Siyudad sa Tagbilaran, Probinsiya sa Bohol alas 9:18 sa gabii, Martes, Abril 29, 2025.
Si PDEA 7 Acting Regional Director Alex Tablate niila sa target sa operation nga si alyas Rendon, 24, flower decorator nga residente ra sab sa maong lugar.
Lakip sa nadakpan silang alyas Darwin ug alyas Boy, 28 nga pulos taga Barangay Cogon, Dakbayan sa Tagbilaran nga naabtan sa mga operatiba sulod sa drug den.
Nakuha sa mga sakop sa PDEA Bohol ang napulo ka pakete sa gituohang shabu nga motimbang sa 10 gramos nga dunay estimated average market value nga P68,000, buy-bust money ug mga drug paraphernalia.
Matod ni Leia Alcantara information officer sa PDEA 7 nga upat ka semana nila nga gipaubos sa case buildup ang maong drug den human madawat ang kasayuran gikan sa kasaligang tinubdan.
Giingong makabaligya si alyas Rendon og 25 gramos matag semana gikan sa iyang supplier.
Ang mga nakuhang ebidensya giduso sa PNP Bohol Forensic Unit alang sa chemical analysis ug proper disposition samtang giandam na ang kasong kalapasan sa Section 6, 6, 7 11 ug 12, Article II, Republic Act 9165 batok sa mga suspek. / AYB