Balay suyopanan sa dakbayan sa Tagbilaran city, Bohol nga gipadagan sa usa ka call center agent gironda sa mga sakop sa Philippine Drug Enforcement Agency (PDEA) Bohol Provincial Office inabagan sa Bohol Police Provincial Office ug Naval Forces Central 7 sa Purok 3, Barangay Booy, ala 1:05 sa Lunes sa hapon, Nobiyembre 20, 2023.
Ang subject sa operation nga maoy nagpadagan sa drug den giila nga si Andrew Michael Sta. Catalina, 23.
Lakip sa nadakpan mao sila si Joshua Antoque, 24, wristwatch technician ug Mike Pagatpat Lunasin, 30, lending collector.
Nakuha sa mga operatiba ang upat ka mga pakete sa gituohang shabu nga dunay gibug-aton nga 11 gramos nga dunay estimated value nga P74,800, lakip na ang buy-bust money, cellphone ug nagkadaiyang drug paraphernalia.
Matod ni Leia Alcantara, information officer sa PDEA 7, nga ilang nadawat ang kasayuran gikan sa usa ka kasaligang tinubdan nga dali nila nga gipaubos sa case build up sulod sa dul-an usa ka buwan.
Giingong makabaligya si Sta. Catalina og 5 gramos matag semana. Kasong kalapasan sa Section 5,6,7,11 ug 12, Article II sa Republic Act 9165 kun Comprehensive Dangerous Drugs Act of 2002 ang giandam nga kaso batok sa mga suspek.
