Gironda sa Philippine Drug Enforcement Agency (PDEA 7) uban sa Bohol Police Provincial Office (BPPO) ug Bohol Maritime Police, Tagbilaran City Police station ug Naval Forces Central (Navforcen) ang usa ka drug den sa Purok 5, Barangay Tiptip, dakbayan sa Tagbilaran, lalawigan sa Bohol, alas 9:48 sa buntag sa Lunes, Enero 29, 2024.
Nadakpan lakip ang suspetsadong drug den maintainer nga maoy target sa operasyon nga si Alger Galo, 36, construction worker, ug iyang kauban nga sila si John Depp Guibone, 25, construction worker ug Christine Bantog, 22.
Apil sa nadakpan ang duha nga nagsuyop sa sulod nga silang Maria Nena Pequiño, 33, barbecue vendor, ug Roel Maldora, 30, usa ka collector.
Nakuha sa mga operatiba ang 11 ka pakete sa gituohang shabu nga motimbang og 11 gramos nga dunay estimated market value nga P74,800 lakip na ang buy-bust money, cellphone ug drug paraphernalia.
Matod ni Leia Alcantara, information officer sa PDEA 7, nga nadawat sa ilang buhatan ang impormasyon gikan sa kasaligang tinubdan ug gipaubos dayon kini sa case build up sulod sa tulo ka semana.
Sa kasayuran nga nakuha sa PDEA 7, makabaligya ang maong nga suspek og 10 ngadto sa 20 gramos matag semana.
Kalapasan sa Sections 5, 6, 7, 11, 12, ug 26 sa Republic Act 9165 o Comprehensive Dangerous Drugs Act of 2002 ang atubangon nga kaso sa mga suspek nga naa sa kustodiya sa buhatan sa PDEA Bohol.