Usa ka drug den nga gipadagan sa usa ka construction worker nga ex-convict gibungkag sa mga sakop sa Philippine Drug Enforcement Agency (PDEA 7), Cebu Police Provincial Office ug Talisay City Police Station sa Sityo San Miguel, Barangay Linao, dakbayan sa Talisay alas 9:40 sa gabii, Biyernes, Agusto 21, 2026.
Si PDEA 7 Director Joel Plaza miila sa ilang target nga nadakpan sa buy-bust nga si alyas McLin, 56, molupyo sa nahisgutang lugar.
Lakip sa nadakpan ang duha ka lalaki nga naatlan sa sulod sa drug den nga naghingos og shabu nga silang alyas Ben, 34, ug alyas Mark, 37, construction worker nga pulos taga Barangay Linao.
Nasakmit sa mga operatiba ang lima ka pakete sa gituohang shabu nga motimbang sa 11.12 grams nga dunay estimated average market value nga P75,616, buy bust money ug drug paraphernalia.
Ang mga suspetsado nga nadakpan kasamtangan nga gikustodiya sa PDEA 7 samtang ang mga ebidensya nga nasakmit giduso na sa PDEA 7 Regional Office Laboratory.
Matod ni Leia Alcantara, information officer sa PDEA 7, nga usa ka semana nila nga gipaubos sa case buildup si McLin human madawat ang impormasyon gikan sa usa ka concerned citizen sa maong dapit.
Giingong makabaligya si McLin og 10 grams matag semana gikan sa iyang supplier ug diha ra usab sa drug den gamiton ang shabu.
Nadakpan na niadtong 2019 si McLin sa mga sakop sa Cebu Police Provincial Office sa kaso gihapon sa illegal nga drugas apan nakagawas human maka plea bargain. / AYB
