Gironda sa mga sakop sa Philippine Drug Enforcement Agency (PDEA) 7 inabagan sa kapulisan sa dakbayan sa Talisay ang usa ka drug den sa Sitio Salvador, Brgy. Tangke, dakbayan sa Talisay, alas 7:30 sa gabii, Sabado, Agusto 17, 2024.
Nasikop ang target sa operasyo nga si Ramil Abarquez, 55, ug iyang anak nga si Stephen, usa ka construction worker.
Lakip sa nasikop mao sila si Reymark Abarquez, 30, e-bike driver; Fidel Arnoco, 33, e-bike driver; Areslito Dari Asuncion, 23, salesboy; Feliciano Cabradilla, 25; habalhabal driver; Rhemyan Villaruz, 21, mananagat; ug Antonio Tangub, 43, tighakot sa mga basura.
Nasakmit sa mga operatiba ang 13 ka pakete sa shabu nga motimbang sa 16 gramos nga dunay estimated average market value nga P108,800 lakip sa buy-bust money, P500 nga gituhoan g kita sa pagpamaligya sa ilegal nga drugas ug mga drug paraphernalia.
Gibutyag ni Leia Alcantara, information officer sa PDEA 7, nga duha ka semana nila nga gipaubos sa case buildup ang ilang target human madawat ang impormasyon nga nagpadagan kini'g drug den sa lugar.
Giingong makabaligya ang suspek og 15-20 gramos matag semana diin ang iyang kustomer didto lang usab mogamit sa ilegal nga drugas bugti sa bayad.
Kalapasan sa Republic Act 9165 ang atubangon nga kaso sa mga suspek nga naa na sa kustodiya sa PDEA 7. / AYB