Drug pusher nasakmitan og P.6M balor nga drugas

SunStar Cebu City
SunStar Cebu City

Giila nga high value individual (HVI) nadakpan sa gilusad nga buy-bust sa mga sakop sa Guadalupe Police Station, alas 10:55 sa gabii, Martes, Hunyo 18, 2024, sa Sitio San Roque Banawa, Brgy. Guadalupe, Siyudad sa Sugbo.

Ang 38 anyos nga suspek nagpuyo usab sa maong lugar, nakuhaan og binulto sa gituohang shabu nga motimbang og 100 gramos nga dunay standard drug price nga P680,000.

Namonitor ang ilegal nga kalihukan sa suspek ug dihang nakompirmar, gilusad ang anti-illegal drug operation sa pagpangulo ni Police Major Miles Damoslog, hepe sa Guadalupe Police Station.

Makaduha na ka higayon nga nadakpan sa Guadalupe Police Station ang suspek sa kaso sa ilegal nga drugas.

Nadakpan usab siya pipila ka mga tuig nga nakalabay sa kasong pagpangawat.

Giangkon sa suspek nga namaligya siya sa ilegal nga drugas apan igo lang siya gisugo sa usa ka personality nga wala niya gitug-an kon kinsa apan iya na nga gibutyag ngadto sa mga polis.

“Kana baligya nako, Sir, naa koy bahin nga P3,000. Naay moduol nako nga sakyanan nga mokuha sa halin unya naa sad mohatod sa butang nga naka motor,” matod sa suspek.

Nagkaila sila sa iyang tinubdan sa ilegal nga drugas pinaagi sa cellular phone.

Napugos siya sa pagsulod sa pagpamaligya sa ilegal nga drugas tungod kay wala siyay laing trabaho.

Ang suspek gibalhog na sa selda sa kapulisan samtang nagpaabot nga mapasaka ang tukmang kaso sa paghupot sa gidiling drugas ngadto sa kor­te. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph