Gihulagway sa kapulisan nga usa ka drug den nga gihimo sab nga sex den sa dalan M. Dela Concepcion, Barangay Suba, dakbayan sa Sugbo gironda sa Philippine Drug Enforcement Agency (PDEA 7) inabagan sa Sawang Calero Police Station sà Cebu City Police Office (CCPO), alas 4:20 sa hapon sa Miyerkules, Enero 10, 2024.
Nasikop mao sila si Rosa Atillo, 50, giilang den maintainer nga target sa buy-bust ug ang iyang live-in partner nga si Rezil Cabaral ,48.
Lakip sa nadakpan si Enalyn Labrador, 36, way trabaho, taga Brgy. Sawang Calero, Siyudad sa Sugbo.
Nakuha sa mga personnel sa PDEA 7 ang unom ka mga pakete sa gituohang shabu nga motimbang og 18 gramos nga dunay estimated market value nga P122,400, lakip na ang marked money ug drug paraphernalia.
Matod ni Leia Alcantara, information officer sa PDEA 7, nga gipaubos nila sa usa ka buwan nga case build up ang mga suspek human nila nadawat ang impormasyon gikan sa concerned citizen.
Sa impormasyon nga ilang nakuha, makabaligya si Atillo og 25 gramos matag semana.
Lakip sa nakuha nga kasayuran sa PDEA 7 nga ang maong drug den gihimo usab nga sex den.