Usa ka tigpayuhot sa ilegal nga drugas sa Sitio Laray, Barangay Kamputhaw, dakbayan sa Sugbo ang nasikop sa gilusad nga buy-bust sa mga sakop sa City Intelligence Unit sa Cebu City Police Office (CCPO), alas 5:35 sa hapon, Miyerkules, Oktubre 23, 2024 nga miresulta sa pagkasakmit sa ilegal nga drugas ug armas.
Ang suspek giila nga si Mark Gil Baydal Basbas, 35, residente sa Sitio Alaska Proper, Barangay Mambaling, syudad sa Sugbo.
Nasakmit sa kapulisan ang mga pinakete sa gituohang shabu nga motimbang sa 10 gramos nga dunay standard drug price nga P68,000.
Lakip sa nakuha sa iyang posisyon ang usa ka kalibre .38 nga pistola nga dunay tulo ka buhing bala niini.
Ang CIU sa CCPO sa pagpangulo ni Police Lieutenant Christopher Irwin Sanchez ubos sa supervision ni Police Lieutenant Colonel R Araquil Guardaya nakadawat og impormasyon labot sa pagpamaligya sa illegal nga drugas sa suspek.
Dali nila nga gipaubos sa monitoring ug nasuta nga nalambigit kini sa pagpayuhot og shabu sa maong lugar gilusad dayon ang buy-bust.
Kalapasan sa balaod batok sa gidiling drugas ug pagdala og armas ang ipasaka nga kaso sa CIU batok sa suspek. / AYB