Duha ka mananagat sa Lungsod sa Dauis, Probinsiya sa Bohol ang nabalhog sa Bohol Police Provincial Office human na-buy-bust sa mga personnel sa Provincial Intelligence Unit ala 1:50 sa buntag, Huwebes, Hulyo 10, 2025, sa Purok 1, sa naasoy nga barangay.
Ang mga dinakpan giila nga sila si Jose Ever Campaña, 39, nga maoy target sa operation ug ang iyang bata-bata nga si Bebiano Oribia, 37, nga pulos taga Purok 3, Barangay Mantatao, Lungsod sa Calape.
Nakuha gikan kanila ang dagkong putos sa gituohang shabu nga motimbang og kapin duha ka kilo nga dunay standard drug price nga P13.8 milyunes.
Sa imbestigasyon sa kapulisan nga na-monitor nila ang ilegal nga kalihukan ni Campaña ug dinagko ang iyang ibaligya nga ilegal nga drugas.
Atol sa pagpatuman sa Oplan Tokhang, si Campaña usa sa mga drug surrenderer apan nibalik sa naandan nga trabaho nga mao ang pagpayuhot sa ilegal nga drugas nga siya ang tinubdan sa suplay .
Ang modus sa duha, ilang i-deliver ang ilegal nga drugas pinaagi sa pagsakay sa banca paingon sa mga Lungsod sa Calape, Tubigon, Loon, Maribojoc, Dauis, Panglao, Siyudad sa Tagbilaran, ug mga silingang mga dapit. / AYB