Drugas ‘motibo’ sa pagpatay

GIPATAY: Patay nang nag­buy-od si Dexter Labitad, 23, human pu­sila sa duha ka mga tawo niadtong Lunes sa gabii sa Nivel Hills, Brgy. Busay, dakbayan sa Sugbo.
GIPATAY: Patay nang nag­buy-od si Dexter Labitad, 23, human pu­sila sa duha ka mga tawo niadtong Lunes sa gabii sa Nivel Hills, Brgy. Busay, dakbayan sa Sugbo. TAMPO

Namatay ang usa ka 23 anyos nga lalaki human gipusil sa makadaghang mga higayon sa Nivel Hills, Brgy. Busay, Dakbayan sa Sugbo sa alas 9:30 sa Lunes sa gabii, Disyembre 11, 2023.

Ang biktima giila sa iyang mga kabanay nga si Dexter Labitad, 23, taga Barangay Buanoy, lungsod sa Balamban.

May kalambigitan sa ilegal nga drugas ang gisusi nga motibo sa kapulisan.

Sa imbestigasyon sa Police Community Precinct 12 sa Malubog pinaagi ni Police Major Marvin Fegarido, nakaangkon og samad pinusilan sa ulo ug lawas ang biktima gikan sa gituohang kalibre .45 nga pistola.

Sigun sa mga saksi nga duha ka wala mailhing mga lalaki nga luwan sa motorsiklo ningduol sa biktima, pipila ka segundo ang milabay buto-buto sa armas na ang ilang nadungog.

Dali nga ningsibat ang mga killer sa wala matino nga direksyon ug dali usab nga nanawag ang mga barangay tanod og pulis ug nipahibawo labot sa hitabo.

Sa pagsusi sa mga sakop sa Scene of the Crime Operation (Soco) nakakuha sila og tulo ka mga kabhang sa bala ug lima ka mga basiyo sa kalibre .45 nga pistola.

Lakip sa nakuha sa mga polis ang usa ka pakete sa gituohang shabu sa bulsa niini nga gituohang napalit niya gikan sa usa ka drug personality.

Ang kabanay sa biktima nga taga Balamban buntag na sa Martes, Disyembre 12, 2023 nasayod sa nahitabo kang Labitad.

Dunay nanawag nila nga kauban, matod pa, sa biktima nga nipahibawo nga nadisgrasya sila apan wala moklaro kon unsa nga matang sa disgrasya.

Tungod niini, matod ni Police Lieutenant Colonel Janette Rafter, nga ilang ilhon kinsa ang maong tawo nga maoy kauban ni Labitad sa dapit atol sa pagpamusil.

Ang kapulisan aduna nay gisubay nga person of interest apan giklaro ni Rafter nga ila pa kining ipaubos sa imbestigasyon.

“Naa tay person of interest mao ni ang atong gitan-aw sa pagkakaron ug atong gipangita although identified nani siya pero ganina giadto sa ilang balay wala didto,” matod ni Rafter.

Drugas ang usa sa ilang gitan-aw nga motibo sa krimen ug nagpadayon ang gihimong imbestigasyon sa kapulisan kon kinsa ang responsabli sa pagpusil.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph