Nasikop sa buy-bust sa Mambaling Police Station ang drummer sa usa ka Sinulog contingent niadtong alas 11:50 sa gabii, Miyerkules, Enero 15, 2025, sa Sityo Alumnos, Barangay Basak San Nicolas, Dakbayan sa Sugbo.
Ang mga nasikop mao sila si; Victor Bohol Quijano, 45, drummer sa usa ka dancing contingent sa Sinulog, taga Sityo Caimito, Basak San Nicholas, ug si Arnold Tang Villamor, alyas Biato, 38, nga maoy target sa buy-bust nga taga Sitio Panagsama sa samang barangay.
Nakuha gikan kanila ang siyam ka pakete sa gituohang shabu nga motimbang sa 30 gramos nga adunay standard drug price nga kapin sa P2,000.
Base sa imbestigasyon sa Mambaling Police Station nga namonitor nila ang mga suspek nga mamaligyag ilegal nga drugas.
Gumikan niini, gilusad dayon sa kapulisan ang operasyon.
Apan gihimakak ni Quijano nga mamaligya siya og ilegal nga drugas tungod kay igo lang siya mogamit aron magpalagsik sa lawas ug maka-focus ilabi na nga sunodsunod ang ilang praktis alang sa Sinulog Festival.
Giangkon hinuon niini nga magsige na siya og gamit og shabu kay moabtik siya kon makasuyop.
Giandam na ang kaso sa kalapasan sa Section 5 ug 11, Section II Republic Act 9165 nga ipasaka sa Mambaling Police batok sa duha ka suspek. /