DSWD 7, ASP Cebu naghiusa alang sa ‘Angels Walk for Autism’ pagsuporta sa autism community

Nipakita ang Department of Social Welfare and Development (DSWD) Field Office 7 – Central Visayas sa ilang suporta alang sa mga indibiduwal nga anaa sa autism spectrum pinaagi sa pag-apil sa kalihukan nga ‘Angels Walk for Autism,’ nga giorganisar sa Autism Society of the Philippines (ASP) Cebu Chapter niadtong Abril 27, 2025, sa SM Seaside City Cebu.

Ang mga kawani ug trainees gikan sa Area Vocational Rehabilitation Center (AVRC) II, usa ka pasilidad sa pagbansay sa DSWD 7 alang sa mga tawo nga adunay mga kakulangan, miduyog sa kapin sa 2,800 ka partisipante sa advocacy walk.

Ang Abril maoy World Autism Acceptance Month ug ang Angels Walk for Autism nga giorganisar sa lainlaing ASP chapters sa tibuok nasod, nilambo pag-ayo sukad sa pagsugod niini niadtong 2000.

Karong tuiga, 30 ka siyudad sa tibuok Pilipinas ang misalmot sa maong kalihukan nga nagpakita sa ilang lig-ong suporta sa autism community.

Ang kalihukan kabahin sa nagpadayon nga kampanya sa ASP sa pagtukod og “Autism-OK Cebu” nga nagpasiugda sa pagdawat, pagdayeg, ug pagpahiluna sa mga indibiduwal sa autism spectrum.

Kini nga inisyatiba nagsuporta sa mas lapad nga tumong sa pagka-inclusivity sulod sa sektor sa Persons with Disabilities.

Si Margie D. Pinton, focal person sa DSWD 7 alang sa PWD Sector, nihatag og gibug-aton sa kamahinungdanon sa kalihukan sa pagpalig-on sa inclusivity movement.

“The DSWD 7 chairs the Regional Committee for Disability Affairs (RCDA), and we are proud to show our support alongside our partners from the government and private sectors. It reminds us that we stand in solidarity with individuals on the autism spectrum,” matod niya.

Ang maong lakaw naghiusa sa Cebu autism community lakip ang mga partisipante gikan sa learning institutions, therapy centers, negosyo, ahensiya sa gobiyerno, non-government organizations, socio-civic groups, volun­teers, media, ug advocates.

Ang SM Cares, ang corporate social responsibility arm sa SM Supermalls, hugot nga nisuporta sa maong aktibidad.

Ang mga partisipante nga nagsul-ob og green shirts, nagparada sa mall aron ipahibalo ubang mga kawani sa lainlaing mga tindahan nga nangumusta kanila pinaagi sa pagwarawara sa berde nga mga flaglet.

Si ASP Cebu Chapter President Rosa Edna L. Hubahib nipadayag sa iyang kinasingka­sing nga pasalamat sa tanang partisipante sa ilang suporta.

“Each year, our numbers continue to grow, as seen in the increased space we occupy compared to previous years. The community energy, passion, and excitement are building, and we can feel the momentum growing,” pulong niya.

“We are proud to shine a spotlight on the unique abilities of individuals on the autism spectrum. Today, we celebrate the success of ASP ARTismo, a platform that allows artistic talents to flourish, using art as a powerful form of self-expression,” sigon ni Hubahib.

Gisaulog usab sa maong kalihukan ang mga talento ug pagkamamugnaon sa mga indibiduwal sa autism spectrum pinaagi sa pagpasiugda sa flagship program sa ASP, ang ARTismo nga nitapos sa usa ka talent showcase human sa lakaw. / PR