Nisalmot ang mga representante sa Department of Social Welfare and Development (DSWD) Field Office 7 uban sa mga miyembro sa Inter-Agency Council Against Trafficking 7 – Violence Against Women and their Children (IACAT-VAWC) sa selebrasyon sa International Women’s Day sa Dakbayan sa Sugbo niadtong Marso 8, 2025.
Nitapok ang maong kalihukan nga gimugna sa Cebu City Women and Family Affairs Commission sa nagkalainlaing sektor lakip ang mga ahensiya sa gobiyerno, non-government organizations, ug barangay gender and development groups isip pag-obserbar sa Women’s Month.
Nagmartsa ang mga partisipante sa mga kadalanan sa sentro sa siyudad paingon sa Cebu Plaza Independencia isip pagpakita sa panaghiusa sa pakigbatok sa gender-based violence samtang nag-promote sa gender equality ug women’s empowerment.
Si Maribeth Lawas nga trabahante sa DSWD, niapil sa kalihukan aron ipakita ang suporta sa kawsa.
“Dako ang akong pagsalig nga ang pag-apil ug pag-suporta sa mga adbokasiya alang sa mga kababayen-an ug sa mga kabatan-on nga madaugon ang among tingog ug mas masabtan sa kadaghanan ang among mga katungod,” matod ni Lawas.
Nagtuo siya nga pinaagi sa pag-apil, ang iyang tingog bisan pa og gamay makatampo sa usa ka bililhon nga katuyoan. Bisan pa man nga giisip niya ang iyang kaugalingon nga usa ra ka tingog, nasayod siya nga kon maghiusa ang matag usa, kini mahimong usa ka panawagan alang sa mas halapad nga lihok para sa paghatag gahom sa mga kababayen-an.
Ang selebrasyon sa International Women’s Day nga may tema nga "For ALL Women and Girls: Rights. Equality. Empowerment,” nag-awhag sa mga aksiyon nga maghatag og tukmang katungod ug kahigayunan para sa tanan, ug nag-adbokar sa usa ka panglantaw nga pabor sa kababayen-an diin walay bisag kinsa nga mabyaan, sumala sa UN Women.
Sa DSWD 7, ang mga kababayen-an naglangkob og 69.8% sa tibuok puwersa sa trabaho. Nagatuo ang departamento nga pinaagi sa pagpasulong sa mga tumong sa sektor ug pagpakig-alayon sa nagkalainlaing organisasyon, mas daghang kababayen-an ang makasabot sa kamahinungdanon sa maong kalihukan, samtang ang mga kalalakin-an makasabot nga ang katilingban angay ug kinahanglan nga patas alang sa tanan.
Gipasiugda ni Assistant Regional Director for Operations Juanito C. Cantero sa iyang speech nga si Director Shalaine Marie S. Lucero mao ang nagdumala sa DSWD sa Central Visayas, usa ka kababayen-ang lider nga nag-una ug nagpakita og kaisog nga pinaagi sa iyang talagsaong mga kontribusyon, nakab-ot ang dagkong kalampusan sa natad sa social work.
“Our theme for Women’s Month is also a fitting recognition that puts a spotlight on women leaders across various sectors. We should celebrate how women work hard to earn their rights, and it is important to support this cause not just in March or on Women’s Day but throughout the entire year,” matod niya.
Aron mapalambo ang paghatag gahom sa mga kababayen-an, ang DSWD 7 naghimo og mga pamaagi aron mahatagan sila og kahigayunan sa panginabuhian ug reporting mechanisms alang sa mga kaso sa violence batok sa kababayen-an ug kabataan lakip na ang paghatag og psychosocial nga tabang para sa mga kababayen-an ug kabataan nga victim-survivors sa abuso. / PR