DSWD 7 mitambong sa sisyon sa DRCC
DSWD 7 mitambong sa sisyon sa DRCC

DSWD 7: Mga kabos sa CV sa 2023 mikunhod

Ang Department of Social Welfare and Development sa Central Visayas (DSWD) 7 mitaho nga mikunhod ang insidente sa kakabos sa mga pamilya sa rehiyon sa unang semester sa 2023.

Sa Central Visayas, ang insidente sa kakabos mikunhod gikan sa 26.8 porsyento sa unang semester sa 2021 ngadto sa 23.9 porsyento sa unang semestre sa 2023, sumala ni DSWD 7 Director Shalaine Lucero.

Ang datos nga gitaho sa DSWD 7 gikan sa Philippine Statistics Authority (PSA). Wala’y survey sa unang semestre sa 2022.

Ang insidente sa kakabos mao ang gidaghanon sa mga indibidwal nga adunay kita nga ubos pa sa per capita po­verty threshold nga gibahin sa kinatibuk-ang gidaghanon sa mga indibidwal.

Ang DSWD 7 usab mitaho nga mikunhod ang “subsis­tence incidence” sa rehiyon gikan sa 16.4 porsyento sa unang semestre sa 2021 ngadto sa 13.7 porsyento sa parehas nga panahon sa 2023.

Ang subsistence incidence mao ang porsyento sa mga Pilipino nga ang kita dili igo aron mapalit bisan ang mga sukaranang pagkaon.

Si Lucero miingon nga sa 2023, ang DSWD 7 migasto og P13.2 bilyon alang sa iyang social protection program nga miserbisyo sa 2.3 milyunes nga benepisyaryo.

Niadtong Disyembre 2023, ang PSA nagpagawas og report nga nagpakita nga ang insidente sa kakabos sa Central Visayas sa unang semestre sa 2023 mas taas pa kaysa na­syonal nga insidente sa kakabos nga 22.4 porsyento.

Ang PSA nag-report usab nga sa unang semestre sa 2023, gikan sa 17 ka rehiyon sa nasod, ang Central Visayas adunay kinadaghanang gidag­hanon sa mga kabos nga indibidwal nga niabot sa 2.56 milyones; samtang ang Sugbo nag-una sa mga probinsya nga adunay 1.72 milyones nga kabos nga indibidwal.

Ang PSA 7 nga datos nag­representa sa 10.1 porsyento sa 25.24 milyones nga kabos nga mga Pilipino niadtong panahona.

Preliminaryong resulta sa PSA gikan sa unang pagbisita sa 2023 Family Income and Expenditure Survey nagpakita nga dako nga bahin sa populasyon, mga 31 porsyento, nagpuyo sa kalisod, nga naghatag sa Central Visayas sa panguna nga pwesto. / CDF

SunStar Publishing Inc.
www.sunstar.com.ph