Ang mga clean-up drive maoy usa sa mga inisyatibo nga gihimo sa daghang mga organisasyon, sama sa Association of Regional Executives of National Government Agencies sa Rehiyon 7 (Arena 7), aron pagpakaylap sa kahibalo ug pag-edukar sa publiko sa kamahinungdanon sa pagpreserbar sa kinaiyahan.
Isip miyembro sa Arena 7, ang Department of Social Welfare Development (DSWD 7) niduyog sa kalihukan, nga nagpasundayag ug nagpakita sa iyang environmental stewardship ug social responsibility.
Ang DSWD 7 team nitabang sa pagpanglimpyo ug paghawan sa mga basura sa giila nga dapit sa Barangay Mambaling, dakbayan sa Sugbo.
Ang DSWD team nakakolekta og 18 ka kilo nga single-use plastic, pito ka kilo nga food packaging, unom ka kilo nga PET bottles, siyam ka kilo nga styrofoam, usa ka putos sa baso, upat ka sako nga sinagol, kawayan, ug kahoy.
“Nalipay ko nga usa ko sa niapil sa clean-up drive kay nadugangan ang akong kahibalo bahin sa pagbahig sa basura, ilabina ang pag-apil sa matang sa plastic, nga dili diay tanan plastic puyde itipon tanan ,” matod ni Allan Sumaging, usa ka kawani sa DSWD, kinsa niapil sa kalihukan.
Matod ni Sumagingsing nga iyang gipaambit ang iyang nakat-unan sa kalihukan ngadto sa mga sakop sa iyang pamilya ug gidasig ang tanan sa pagsugod sa pagpanglimpyo sa ilang mga panimalay ug opisina.
Gipaambit ni DSWD 7 Regional Director Shalaine Lucero nga ang mga kalihukan sa pagpanglimpyo sa kinaiyahan nakapahunahuna niya pag-ayo bahin sa pagbag-o ug pagtabang kon giunsa sa mga tawo, labi na sa mga kawani sa ahensya nga makunhuran ang basura ug mahimong mas maayong tigdumala sa mga kahinguhaan. / PR