Nagsugod na ang mga personnel gikan sa Disaster Response Management Division (DRMD) sa Department of Social Welfare and Development (DSWD) 7 sa ilang paglibot sa mga pantalan ug lokal nga panggamhanan sa Lalawigan sa Sugbo aron hisgutan ang plano nga pag-preposition sa Ready-to-Eat Foods (RTEFs) isip kabahin sa Buong Bansa Handa disaster preparedness initiative sa departamento.
Gibisita sa team ang Maya Port sa Daanbantayan, Danao Port, ug ang mga Local Government Unit (LGU) sa Medellin, San Remigio, Santander, Samboan, ug Toledo.
Ang maong lakang naglakip sa inspeksyon sa mga warehouse facilities sa LGUs aron susihon ang ilang kapasidad sa pag-stockpile og RTEFs.
Gitutokan sa inspeksyon ang kahimtang sa mga storage area ug ang kaandam sa matag lugar sa panahon sa emerhensya.
Tumong sa inisyatibo ang pagpalig-on sa kahapsay ug kadali sa pag-apudapod sa ayuda ilabi na sa panahon sa kalamidad.
Pinaagi sa RTEFs, dali nga matabangan ang mga displaced individuals labi na ang mga pasahero nga masangit sa mga pantalan pinaagi sa pagkaon nga andam kan-on ug dili na kinahanglan lutuon.
Ang DSWD 7 nagtan-aw sa importansya sa pakigtambayayong sa mga LGU aron mas mapalambo ang kaandam sa rehiyon batok sa mga katalagman.
Ang ilang pagbisita nagpamatuod sa padayong paningkamot sa departamento nga masiguro nga ang tanang dapit sa Sugbo andam motubag panahon sa krisis./ PR