Gikiha sa Department of Social Welfare and Development (DSWD) 7 ang Simply Share Foundation Inc. (SSFI), usa ka foundation nga nagbasi sa Cebu City, tungod sa giingong pag-solicit og cash ug relief goods.
Ang DSWD niluwat og pamahayag gikan sa ilang central office official Facebook page niadtong Martes, Abril 8, 2025, nga kini kalapasan sa Presidential Decree (PD) 1564, o ang Solicitation Permit Law.
Ang reklamo gipasaka niadtong Martes, Abril 8, 2025, sa DSWD Field Office 7 ngadto sa Cebu City Prosecutor’s Office.
Ang gikiha mao sila si Pamela S. Baricuatro, ang Founder, ug ang iyang anak Elisse Nicole B. Catalan, ang Executive Director sa SSFI.
Si Baricuatro kandidato pagka gobernador batok sa incumbent nga si Gwen Garcia.
Matod ni DSWD 7 Regional Director Shalaine Marie Lucero nga maoy complainant, ang Office of the City Prosecutor kasamtangan nga nag-evaluate sa Complaint-Affidavit ug ubang mga dokumento aron pagsiguro nga nakatuman kini sa filing requirements.
Ang legal team sa DSWD 7 nisang-at sa kalapasan sa PD 1564 (Solicitation Permit Law) in relation to Republic Act 10175, ang Cybercrime Prevention Act.
Gitataw ni Lucero nga kining kaso sa SSFI magsilbing pasidaan sa ubang social welfare and development agencies (SWDAs) nga dili maghimo og public solicitations kon way permit.
“Let this be a warning against SWDAs who have not yet secured their license and permit for public solicitation. They will face the full force of the law if they continue with this illegal practice,” matod ni Lucero.
Agi og tubag, si Baricuatro nipagawas og pamahayag sa Facebook page nga ‘Cebu Governor Pam Baricuatro 2025’, nga nanghimakak sa pasangil sa DSWD.
“Malooy lang ko sa DSWD region 7 ug sa RD kay buotan man unta na sila og compliant kaayo me. Natagaan pa gani me og license and part ana kay e review ang past operations and records,” kabahin sa pamahayag ni Baricuatro.
Gikuwestyon sab ni Baricuatro ang pagsentro sa DSWD sa mga kalihukan sa SSFI atol sa Bagyong Odette sa 2021, panahon nga daghan sab nga mga civic group ang naglihok sa pagpanghatag og hinabang.
“However, we respectfully question why activities in 2021 during Typhoon Odette is being question. Where civic groups and private individuals also mobilized relief,” matod ni Baricuatro.
Gitataw ni Baricuatro nga siya ug ang ilang grupo mobarog ug manalipod sa ilang katungod.
“We will stand our ground and fight for the rights on the importance and relevance of NGOs in nation building,” matod niya. / CDF