Sulod sa upat ka tuig, padayon nga nag-organisar ang Home for Girls (HFG) sa Department of Social Welfare and Development (DSWD) 7 sa Nutri Fun Run isip pagpanukad nga aktibidad sa National Nutrition Monthb nga gihimo pag-usab sulod sa pasilidad niadtong Hulyo 8, 2025, ug gisundan og healthy buffet breakfast para sa tanang partisipante.
Ang HFG usa ka residential care facility alang sa mga batang babaye nga nag-edad og 7 hangtod wala pa mag-18-anyos nga mga biktima sa pag-abuso, pagpasagad, ug eksploitasyon.
Sumala ni Center Head Jennifer S. Abastillas, ang maong inisyatibo nagtinguha sa pagpasiugda sa hustong nutrisyon ug aktibong lifestyle, samtang gidasig ang mga batang babaye sa pagpalambo og maayong batasan sa pagkaon ug panglawas nga mahimong magamit sa tibuok nilang kinabuhi.
“Now that we’re in our fourth year, we also see this as an opportunity to strengthen our bond as a team. Our houseparents, social workers, and other staff have worked day and night to make this activity possible. At the same time, our girls eagerly look forward to it by waking up early and showing their excitement,” matod ni Abastillas.
Gipasiugda sa Nutri Fun Run dili lamang ang kahimsog apan ang panaghiusa ug pagbati sab sa komunidad sa sulod sa center. Sa pagkakaron, nag-atiman ang HFG sa 43 ka mga batang babaye diin matag-usa nakadawat og suportang legal, emosyonal, ug sosyal alang sa ilang pag-ayo ug rehabilitasyon.
Usa sa mga partisipante mao si Erika nga nidaog sa ikaduha nga pwesto sa dagan, samtang ang iyang igsuon nga si Julia nakasulod sa ika-12.
“Nalipay ko kay nakadaog ko sa dagan. Hilig gyud kog dagan kaniadto pa, pero mas nalipay ko kay lingaw, nindot ang mga duwa diri, ug naa akong ate kuyog nako,” ingon ni Erika.
Nangandoy siya nga mahimong policewoman aron mapanalipdan ang iyang igsuon ug uban pang batang babaye sa kadaot, samtang si Julia gustong mahimong magtutudlo aron makatabang sa uban pinaagi sa iyang kasinatian.
Sa wala pa ang fun run, ang mga batang babaye nagdesinyo og nutrition-themed headbands nga nagpakita sa ilang pagsabot sa mga pagkaong may sustansya.
Si Anna, dili tinuod nga ngalan, usa sa mga biktima sa pagpasagad gikan sa Madridejos, Cebu nagpakita sa iyang kahanas sa art, ilabi na sa art therapy sessions.
Siya nagtuo nga ang prutas ug utanon dili lang pagpahimsog sa lawas apan makapaayo sa panit.
Usa pa ka regular nga kalihukan sa pasilidad mao ang Bell of Life, usa ka hydration initiative nga nagpahimangno sa mga batang babaye nga moinom og tubig sa hustong oras matag adlaw. Ang mga partisipante naglinya sa ilang tagsa-tagsa ka baso sa takdang oras aron moinom og tubig.
Ang maong programa gilangkit sa disiplina ug panginahanglan sa kahimsog.
“The Bell of Life not only promotes physical well-being but also encourages discipline and mindfulness, fostering better self-care habits among the girls,” matod sa usa sa mga staff.
Pinaagi sa mga kalihukan sama sa Nutri Fun Run ug Bell of Life, nagapadayon ang DSWD Home for Girls sa pag-ugmad sa kahimsog, edukasyon, ug kadasig sa kinabuhi sa mga batang babaye nga ilang gitabangan nga usa ka dakong lakang padulong sa usa ka mas inklusibo ug malungtaron nga kaugmaon. / PR