Nagpahigayon ang Department of Social Welfare and Development (DSWD) Field Office 7 – Central Visayas sa duha ka adlaw nga Regional Area-Based Standards Network (ABSNET) Conference 2025 sa Dakbayan sa Mandaue.
Nitambong sa maong aktibidad ang mga opisyal sa Regional ABSNET, ingon man mga aktibo, rehistrado, lisensyado, ug accredited nga Social Welfare and Development Agencies (SWDAs).
Tumong sa maong kalihukan mao ang pagpadayon sa usa ka functional ABSNET aron sa pagpalig-on sa panag-uban ug pagsiguro sa epektibo nga pagpatuman sa regulatory functions ug mga serbisyo.
Sa ikaduhang adlaw sa conference, gihisgutan sa mga partisipante ang pipila ka mga importanteng hilisgutan lakip na ang Memorandum Circular No. 09, Series of 2024 nga may titulong “Revised Guidelines in the Processing and Issuance of Regional and National Public Solicitation Permits.”
Apil sab sa ilang gihisgutan ang updates sa Harmonized Electronic License and Permit System (Helps), ang 7S sa Maayong Pagdumala sa Panimalay (Good Housekeeping), ug ang pagpahigayon sa usa ka sharing session bahin sa 1st National ABSNET Bi-Annual Convention 2025.
Sa iyang mensahe, gihisgutan ni Regional Director Shalaine Marie Lucero ang kamahinungdanon sa kolaborasyon.
Naglaum siya nga magpadayon sila sa pagtinabangay sa ilang mga paningkamot, labi na sa pagtabang sa mga SWDA sa rehiyon.
Gihatagan og gibug-aton ni Director Lucero nga dili mahimo sa gobiyerno nga mag-inusara sa trabaho hinungdan nga iyang gipasalamatan ang pakigtambayayong sa mga SWDA ug Departamento sa paghatag sa mas episyente nga serbisyo.
Bisan pa sa pag-ila nga ang DSWD dili usa ka hingpit nga sistema ilabi na ang bag-ong giilusad nga Harmonized Electronic License and Permit System (Helps), gipadayag ni Director Lucero ang iyang pagsalig nga aduna pay lugar alang sa kaayohan ug nga mas mapaayo pa kini sa umaabot.
“As we orient you and create within you an understanding of the current initiatives that we have, especially the HELPS, we would gladly listen to your feedback. Let us know which part of the system is difficult and which part of the system can be improved,” panawagan ni Director Lucero bisan kon ang mga inisyal nga tiggamit sa sistema nakakita nga episyente kini.
Hinuon, gipasalig niya sa mga partisipante nga ang Departamento magpadayon sa paghatag ug intensive assistance aron matabangan ang ilang mga pasilidad sa pinuy-anan nga mahimong Centers of Excellence.
Kahinumduman, ang Field Office sa pagkakaron adunay lima (5) ka Centers of Excellence nga ang tanan nakab-ot sa Level 3 accreditation status alang sa pagtakda sa benchmark sa pag-atiman, serbisyo, ug pagdumala.
Apil niini ang Reception and Study Center for Children (RSCC), Home for Girls, Regional Haven for Women, ug Area Vocational Rehabilitation Center II (AVRC II) sa Dakbayan sa Sugbo, ingon man ang Regional Rehabilitation Center for Youth (RRCY) sa Munisipyo sa Argao. / PR