GIINAGURAHAN na ug gi-blessingan ang duha ka kanhi Police Community Precinct nga mao ang Malubog ug Adlaon diin pulos nahimutang sa bukirang dapit sa Dakbayan sa Sugbo human nga giaprobahan na sa National Police Commission nga mahimo na kini nga police station sa Lunes, Hulyo 7, 2025.
Nangulo sa pagbukas sa maong mga police station ang hepe sa Cebu City Police Office (CCPO) nga si Colonel Enrico Figueroa, mga kadagkuan sa Police Regional Office 7, regional director sa National Police Commission, ug sa bag-ong napili nga konsehal sa Dakbayan sa Sugbo nga si kanhi heneral nga si Paul Labra.
Ubos sa hurisdiksyon sa Malubog Police Station naglangkob kini sa Barangay Babag, Bonbon, Pung-ol Sibugay, Sinsin, Sirao, Sudlon 1 ug 2, samtang sa Adlaon police station mao ang Paril, Tap-Tap, Guba, Lusaran, Cambinocot, ug Tagba-o.
Matod ni Police Lieutenant Colonel Maria Theresa Macatangay deputy city director for operation sa CCPO nga ang presensya sa mga polis sa bukirang dapit sa Siyudad sa Sugbo maghatag kini og kalig-on sa seguridad sa mga molupyo ug kon lig-on ang seguridad mosunod sab ang kalambuan.
Ang Regional Director sa National Police Commission nga si Attorney Maximo T. Lasaca I nihangop sa pagkahimo sa hingpit nga police station sa duha ka kanhi community police precinct. / AYB