Dugang Automated Counting Machines (ACMs) ang niabot sa Sugbo sa Biyernes, Abril 25, 2025 alang sa piniliay sa Mayo 12, 2025.
Ang maong mga machines gikan sa kaulohan nga niabot sa pantalan sa dakbayan sa Talisay og gihatagan ug igong seguridad sa kapulisan, Highway Patrol Group (HPG) ug Maritime Police hangtod makaabot kini sa storage area.
Si Atty. John Reymund Ceniza, Election Assistant II sa Comelec nagkanayon nga ila gyud gisiguro nga intact ang tanang ACM sa dili pa kini i-biyahe sa kalungsoran pinaagi sa usa ka logistics company.
"To prevent any tampering issues basin mapasanginlan nya mi og bisan unsa. Nakita ninyo nga naay tulo ka seal unya puro single use so kung giputol na to nagamit na ang f2 ra ug ang Comelec nga mo handle. Transparency sab sa mga botante nga nagpakabana ang Comelec sa security sa atong ACMs," matod ni Ceniza sa Abril 25, 2025.
Gipaabot nga mahuman ang pag-deliver niini sa kalungsoran sa katapusang sa Abril.
Gipasalig usab sa Commission on Election (Comelec) nga makasiguro nga dili mahilabtan ang liboan ka mga ACM sa dili pa ang piniliay.
Atol sa pagsusi, dunay pito ka mga ballot boxes ang giingong na-guba apan ilisan ra dayon kini sa kaulohan.
Ang mga ACM maoy gamiton alang sa umaabot piniliay diin subay sa bag-ong features niini, gilaoman ng mas hapsay ug mas paspas ang pagkwenta sa ballota sa matag presinto.
Matod niya nga ang rehiyon nagpaabot sa mga 4,000 ka ACMs sa kinatibuk-an.
Si Pobe nipadayag og pag-laum nga ang tanang ACM, uban ang uban pang mga election paraphernalia, ma-deliver na sa katapusan sa Abril aron masiguro ang tukmang panahon nga deployment.
Ang labing ulahi nga batch sa mga makina anaa karon sa usa ka logistics hub sa Mandaue City, Cebu, diin gipatuman ang hugot nga mga protocol sa seguridad.
Matag yunit maampingong gisulod sa kahon, selyado, ug tin-aw nga gimarkahan sa ilang gitudlo nga munisipyo aron masiguro ang hustong pag-apod-apod sa tibuok Central Visayas. / ANV / CAV