Dugang reklamo ang gipasaka sa laing mga nabiktima sa nagpailang aesthetician nga nakamugna og kadaut sa nawong sa iyang mga kustomer.
Subay sa pakisusi sa National Bureau of Investigation (NBI-7) sa kinatibuk-an, adunay unom ka mga babaye nga nabiktima sa suspek nga si Dimber Dela Cruz Celis nga unang nadakpan sumala sa reklamo sa kustomer niini nga nakabayad og P3,000 apan palpak ang gihimo’ng undereye ug jawtox procedure.
Ang laing mga biktima mao sila si alyas Grace, 22, ug inahan niini nga si alyas Angel nga pulos taga Barangay Pasil, Dakbayan sa Sugbo.
Lakip usab sila si alyas Joan, 31, taga Surigao City; alyas Mother Avatar, 48, taga Barangay Guadalupe, Dakbayan sa Sugbo ug ang uban wala magpahingan, ningdangop sa NBI 7 aron ireklamo og dugang si Celis human mabiktima sa peke nga procedure.
Sagad kanila ni avail sa Hiko nose thread, collagen treatment ug undereye filler sa kantidad nga P5,000 ngadto sa P7,000 ang matag usa kanila.
Matod sa nag-alyas og ‘Mother Avatar, gihimo ang ilang procedure niadtong Abril 14, 2024 sulod sa hotel sa Barangay Lahug, Dakbayan sa Sugbo.
Gusto niining matarong ang porma sa ilong ug matangtang ang eyebags.
Apan imbes nga magpagwapa, nihubag usab ang ilang mga nawong.
Lakip sa ilang nasinati ang pagpanakit sa ulo, pangatol sa eye skin, ug paghupong usab sa bahin sa nawong.
“Ako giingnan akong kauban nga ingna, Day, nga magpa check-up ta kay naa baya gyud unta na follow-up check-up unya sigi mi og tawag, follow-up wala man gyud siyaý reply. So, wala lang mi. So ni chat siya nga moanhi siya maong naka decide na mi nga ato ipa trap kay ngano kaning bato sa akong aping wala jud nawala. Gahi kaayo ang nawong,” matod sa biktima.
Dugang niya nga na-engganyo gyud sila nga mopaubos sa procedure tungod sa nasayran nila nga resulta sa ilang mga kaila nga nindot ang porma sa ilong.
Sa kasamtangan, padayon nga gisusi sa NBI-Cevro ang lain pa’ng mga babaye nga nabiktima ni Celis.
Subay sa inisyal nga gipahibawo sa buhatan, aduna pay laing mga biktima nga moabot og kapin sa 50 kabuok gikan sa nagkadaiyang mga lugar sa nasod.
Si Celis nasikop atol sa entrapment operation sa NBI-Cevro sa Hulyo 19, 2024 sulod sa usa ka hotel sa Dakbayan sa Sugbo. Una na siya’ng nasikop niadtong 2020 tungod sa kaso’ng syndicated estafa sa Butuan isip founder sa Forex Rice Trading Group.
Gipasakaan na usab siya og kaso sa NBI Western Visayas (WEVRO) tungod sa illegal practice of medicine sa Iloilo City niadtong 2023. / ANV