Mohatag ang kagamhanan sa Dakbayan sa Bacolod og dugang mga baligyaanan sa bugas nga tag P20 matag kilo sulod ning semanaha.
Matod ni Mayor Alfredo Abelardo Benitez, nahinabi na niya si Mayor-elect ug Congressman Greg Gasataya ug Secretary to the Mayor Marty Go aron buksan pa ang dugang nga mga baligyaan sa tag P20 matag kilo nga bugas.
“This week, we will open more outlets in Barangays Sum-ag, Handumanan and Granada public markets, and other barangays so that everybody can avail the affordable rice program,” matod ni Benitez.
Niadtong Hunyo 5, 2025, gilusad sa kagamhanan ang pagbaligya sa bugas nga tag P20 matag kilo sa Burgos Public Market, Central Public Market, ug Libertad Public Market.
Nasaksihan ang kalihukan ni Agriculture Secretary Francisco “Kiko” Tiu Laurel Jr., nga nisiguro sa maayo nga kalidad sa bugas nga gibaligya.
Ang pagbaligya sa bugas gidumala sa City Cooperative and Livelihood Development Office.
Matod ni Benitez, nakapalit ang siyudad og 5,880 ka sako sa bugas nga adunay kinatibuk-ang kantidad nga P7.9 milyunes ug nagplano sab sila nga mopalit pa og dugang nga suplay.
Ubos sa programa, ang matag pamilya tugutan og tag 10 kilos matag semana, prayoridad ang mga kabus nga pamilya tungod kay eksperimental pa kini.
Nauna na nga gipahibalo sa Department of Agriculture (DA) ang pilot launch sa tag P20 matag kilo nga bugas sa Visayas isip usa sa mga gisaad ni Presidente Ferdinand Marcos Jr. atol sa 2022 presidential race.
Ang Food Terminal Inc., isip implementing arm sa DA alang sa pagbaligya sa bugas sa mga local government units, mopalit og bugas gikan sa National Food Authority sa presyo nga P33 matag kilo ug ibaligya kini sa mga LGU sa subsidized nga presyo nga P26.50 matag kilo.
Ang sobra sa P20 ang i-subsidized sa LGU ug sa National Government, nga P6.50 matag usa.
Matod ni Benitez ang national government mo-subsidized sa siyudad hangtod Disyembre 2025, ug pagka 2026, sila na ang modumala sa programa.
Matod niya nga kini ang pasalig sa National Government nga ipadayon ang pagbaligya sa bugas sa P20 matag kilo hangtod sa 2028. / MAP