Mohatag og dugang tag P1 milyon nga subsidy si Cebu Governor Gwendolyn Garcia sa 15 ka local government units (LGUs) sa amihanang Sugbo nga ningsalmot sa Suroy Suroy Sugbo northern escapade 2024.
Si Provincial Board Member Andrei “Red” Duterte, tsirman sa committee on tourism, nianunsyo niini atol sa iyang pakigpulong alang sa gobernador sa municipal hall sa Liloan niadtong Huwebes sa gabii, Enero 25, 2024.
Ang LGUs una nga nakadawat og subsidy nga P600,000 gikan sa Kapitolyo aron matabangan sila sa pinansyal sa ilang pagpangandam sa turismo nga inisyatiba.
Ang 15 ka LGUs nga nalakip sa Suroy Suroy Sugbo northern escapade 2024 mao ang Consolacion, Compostela, Carmen, Sogod, Medellin, Daanbantayan, San Remigio, Santa Fe, Madridejos, ug Bantayan, Bogo City, Tabogon, Borbon, Catmon ug Liloan.
Si Duterte niingon nga ang gobernador nalipay ug natagbaw sa gihimo’ng pagpangandam sa 15 ka LGUs alang sa Suroy Suroy, nga nisangpot sa desisyon sa paghatag sa subsidy.
Ang Suroy Suroy Sugbo northern escapade maoy tulo ka adlaw nga tour gikan sa Enero 23 ngadto sa Enero 25.