Gikumotkumot sa taxi driver ang dughan sa iyang pasahero human nasuko nga miplite kini og pulos sensilyo nga P1,000 alas 4:30 sa kaadlawon, Biyernes, Disyembre 1, 2023 sa South Road Properties (SRP) sa Brgy. Mambaling, dakbayan sa Sugbo.
Ang 30 anyos nga biktima uban sa iyang higala, nangayo og panabang sa Mambaling Police Station, apan nakasibat na ang taxi driver.
Nakuhaan og video ang ilang komusyon ingon man ang hulagway sa taxi ug ang drayber.
Ug pagka alas 10:00 sa buntag sa samang adlaw, nasubay sa kapulisan ang operator sa taxi sa Brgy. San Roque, dakbayan sa Talisay.
Nailhan ang drayber nga usa ka 44 anyos (ngan gipugngan samtang wa pa makuhai sa iyang habig), ug taga Brgy. Taboc, dakbayan sa Mandue.
Ang operator giabisuhan sa kapulisan nga pagtahan sa maong drayber, kinsa gikataho nga ang taxi unit niini adto sa iyang panimalay igarahe ug ang abang ipadala pinaagi sa money transfer.
Nasubay sa kapulisan human nakuha sa video ang body number sa taxi ug ang logo sa operator.
Si Major Jonathan Taneo, hepe sa Mambaling Police Station nga nahinabi sa Superbalita Cebu, niasoy nga nagpahatod sa usa ka mall ang biktima uban sa iyang higala.
Miplite kini og P1,000 nga pulos sensilyo ug nasuko ang drayber. Nagkalalis hangtod nga gitamparos niya sa nawong ang biktima.
Gikatahap nga nisukol ang biktima ug nagkaguliyang sila sud sa taxi.
“Nagkumusyon naman niinit ang ulo ato sa driver, gitamparos niya sa nawong! Unya mialigar pa gyud ang biktima “gikumot-kumot iyang _____”, dugang asoy ni Taneo.
Nikanaog ang biktima nisuway unta og sibat ang drayber apan gigukod kini niya ug nakuha sa video nga gilabay sa driver ang P200 nga kuwang nga sukli.
Giingong wala makontento ang drayber sa pagtamparos, gihapit niya og kumot-kumot ang dughan sa babaye.
Sumala ni Taneo sa Dominggo, Disyembre 3, gipaabot nila nga mopatim-aw ang taxi driver aron mahusay sila sa maong kaguliyang apan wala pa gyud kini mopatim-aw.
Ang biktima niingon mopasaka siya og tukmang kaso batok sa taxi driver.
Gipasabot ni Taneo nga kon dili gyud mopatim-aw ang taxi driver, ipasaka sa kapulisan ang kaso nga sexual harassment, o sexual assault ug uban pa.