Gumikan sa bagyong Kristine, giuswag sa wala pa masayri nga petsa ang duha ka mga duwa kagahapon, Huwebes, Oktubre 24, 2024, sa Cebu Schools Athletic Foundation Inc. (CESAFI) basketball event sa Cebu Coliseum.
Gitumbok nga mga duwa mao ang tali sa University of Cebu (UC) Baby Webmasters batok Cebu Eastern College (CEC) Dragons sa juniors division ug UC Webmasters batok Benedicto College (BC) Cheetahs sa seniors division.
Nagkanayon si Commissioner Felix Tiukinhoy Jr. nga ianunsyo ra nila kon kanus-a ipahigayon ang gilaumang kulbahinam nga mga duwa.
Dili man tuod direktang niigo sa Sugbo ang bagyong Kristine apan matod ni Deputy Commissioner Danny Duran nga ilahang nadesisyunan nga iuswag ang mga duwa aron dili mahatagan og kahasol ang nalambigit nga teams tungod sa bati nga panahon.
“Pangitaan lang ni namo og laing adlaw. Nindot biya ning mga duwaa,” matod ni Duran. / ESL