Nabalhog sa Inayawan Police Station ang usa ka 37 anyos nga lalaki human malutsan og warrant of arrest sa kaso sa illegal nga drugas alas 12:05 sa kaadlawon, Biyernes, Hunyo 20, 2025 sa Sitio Paglaum, Barangay Bulacao sa Siyudad sa Sugbo.
Ang akusado nga nabutang kini sa top 4 most wanted person giila nga si Wisley Cabunelas Rabaya, nga residente ra usab sa maong lugar.
Ang Inayawan Police nakadawat og warrant of arrest nga giluwatan ni Judge Anna Lou Fernandez-Cavada sa Regional Trial Court 7th Judicial Region, Branch 57 sa Dakbayan sa Sugbo sa kalapasan sa Section 5 ug 11, Article II, Republic Act 9165 nga pinitsahan niadtong Hunyo 10, 2025.
Ang maong akusado gitakdang moserbisyo na sa iyang sentensya base sa kamanduan sa korte ug gidala na sa Cebu City Jail.
Samtang laing gipangita sa kapulisan sa Probinsya sa Sugbo ang nadakpan sa Barangay Guadalupe pinaagi sa warrant of arrest nga giluwatan sa korte.
Ang akusado giila nga si Jacob Cuambot, 25, taga Purok Sunflower, Barangay Poblacion, Lungsod sa Liloan.
Si Cuambot nalutsan og warrant of arrest niadtong Abril 11, 2025 nga giluwatan ni Judge Annalou Fernandez Cavada, sa RTC Branch 57 sa Dakbayan sa Sugbo sa kaso sa illegal nga drugas nga walay gitugot nga pyansa.
Tungod sa pagkasikop sa maong mga most wanted persons midayeg sa iyang mga personnel si Cebu City Police Office PCOL Enrico Figueroa tungod sa walay hunong sa pagpangita niadtong dunay mga pending warrant of arrest aron mataral na kini sa korte.
Gimanduan pa niya ang tanang police personnel nga mopadayon sa pagpangita niadtong mga wanted person nga hangtod karon gawasnon pa aron mapanubag sa salaod nga ilang nahimo ug kon sila inosente sa usa ka krimen mahatagan usab ni og hustisya nga ipawalay sala sa korte. /AYB