Nakamugna og dul-an sa duha ka mga oras nga kahuot sa trapiko sa Kalmar Junction sa Cebu South Coastal Road sa Brgy. Pooc, Siyudad sa Talisay, ang pagkayabo sa mga kargamento sa usa ka trailer truck mga alas 8 sa Martes sa gabii, Enero 2, 2024.
Napalgan sa imbestigasyon sa City of Talisay Traffic Operations and Development Authority (CT-TODA) nga nitabok sa eskina ang trak nga kusog kaayo ang dagan.
Matod pa ni Joy Tumulak, pangu sa CT-TODA, nga ni-beat sa red light sa traffic light ang drayber nga si Junior Patiga, nagpuyo ra sab sa siyudad.
Si Tumulak niingon nga mo-left turn padulong sa lungsod sa Minglanilla ang drayber apan tungod sa kakusog sa dagan, nangatagak ang gatusan ka mga sinako nga tahop.
Maayo gani kay way naangin nga laing mga sakyanan sa hitabo.
Si Patiga naisyuhan og citation ticket sa kalapasan nga beating the red light, reckless driving, obstruction of traffic ug unsafe cargo.
Gidayeg sa CT-TODA ang operator sa trak nga dali nga nakapadala og mga personnel aron paspas nga makuha ang mga sinako nga tahop gikan sa karsada.
Niabag usab ang mga traffic personnel sa siyudad. / DVG