Dul-an 2,000 ka barangay sa Central Visayas drug cleared na
Moabot na ngadto sa 1,968 ka mga barangay ang drug cleared sa tibuok Central Visayas, apil pa niini ang mga probinsya sa Negros Oriental ug Siquijor.
Kini human nadugangan og 26 ka mga barangay nga gideklara sa Regional Oversight Committee on Barangay Drug Clearing nga drug cleared niadtong Huwebes, Mayo 22, 2025.
Matod ni Leia Alcantara, information officer sa Philippine Drug Enforcement Agency (PDEA 7) nga sa 26 ka mga barangay nga na drug cleared, labing daghan niini nahimutang sa probinsya sa Sugbo nga dunay 13 nga naglangkob sa Barangay PoblaciĆ³n Looc sa lungsod sa Dumanjug, Bato sa lungsod sa Badian, Masaba sa dakbayan sa Danao, Mangyan sa Sibonga, PoblaciĆ³n 1 sa Carcar City, Macaas sa Catmon, Pugtod ug Lagunde sa Oslob, Hingatmonan ug Biasong sa Balamban, San Rafael sa Barili, Kalangahan sa Tuburan ug Tinaan sa Naga City.
Gisundan kini sa lalawigan sa Bohol nga dunay unom nga mao ang Bilangbilangan sa Tubigon, Montesuerte, Montisunting ug Matin-ao sa lungsod sa Carmen ug Bulilis ug Humayhumay sa lungsod sa Ubay.
Samtang lima sa Dakbayan sa Sugbo nga mao ang Bonbon, Bulacao, Pardo, Pahina San Nicolas ug T. Padilla samtang ug duha sa Mandaue nga mao ang Cabancalan ug Maghuikay.
Mibutyag si Alcantara nga sa 3,003 ka mga barangay sa tibuok rehiyon, 70 porsiyento niini ang na deklara na nga drug cleared ug 30 porsiento na lang ang adunay drug-affected barangays nga maoy sunod nga target sa PDEA. / AYB