Dul-an sa P2 milyunes, ang gitagana nga pundo sa Cebu City Government alang sa pagpahigayon sa Buhing Kalbaryo karong tuiga, usa ka relihiyusong kalihokan bahin sa pag-antos ug paglansang kang Hesus.
Nangayo og budget nga P1,942,500 ang buhatan ni Cebu City Mayor Michael Rama sa preparasyon sa 27th Buhing Kalbaryo.
Si Cebu City Councilor Noel Wenceslao, committee on budget and finance chair, niduso sa resolusyon alang sa budget ubos sa City-Sponsored Activities.
Ang resolusyon giaprobahan sa Cebu City Council atol sa regular session niadtong Miyerkules, Pebrero 28, 2024.
Sa miaging tuig, ang programa nagsugod sa Archdiocesan Shrine of San Nicolas de Tolentino sa Barangay Pasil apan ang pinal nga duwa gipahigayon sa bakanteng luna sa V. Rama Ave.
Ning tuiga, wala pa gibutyag ang pinal nga dapit nga pahigayonan niini. / JJL