Natapos na niadtong Miyerkules, Mayo 7, 2025, ang duha ka adlaw nga One-Stop Shop caravan alang sa pagparehistro ug pag-renew sa mga lisensya sa mga armas niadtong mga gunholder nga ni-expired na ang ilang license to own and possess firearms outside residence subay sa nagkaduol nga National ug Local Elections sa Mayo 12.
Matod ni Police Colonel Enrico Figueroa, hepe sa kapulisan sa Cebu City Police Office (CCPO) nga daghan ang nipahimulos sa maong duha ka adlaw nga caravan sa pagpa-renew sa ilang mga lisensya.
Nipahimulos sa One Stop Shop ang dul-an sa 1,000 ka gunholder. Apan base sa data sa Police Regional Office (PRO) 7 dunay kapin sa 4,000 ka mga gunholder ang wala maka-renew sa ilang mga lisensya ug tungod niini gituyo ang pagpahigayon sa maong caravan.
Nipasabot hinuon si Figueroa nga kadtong mga gunholder nga wala makaproseso sa renewal sa ilang lisensya sa armas mamahimo pa sila nga makabisita sa Civil Security Unit 7.
Nibahad ang opisyal nga kon magmagahi ang ang ubang gunholder sa pagparehistro, dunay himuon nga police operation ang CCPO ug mamahimong target ang tag-iya sa armas nga matawag na nga loose firearms.
"Actually this is their chance na i-renew ang kanilang mga baril then if not we will still remind them to renew their firearms and talagang wala parin ay magka-conduct tayo ng police operations against them," matod ni Figueroa.
Gipahibalo ni Figueroa nga ang tanang kandidato sa Dakbayan sa Sugbo nga dunay mga armas pulos na kini narehistro human sa gihimong panawagan sa nanglabay nga mga buwan.
Tinguha sa kapulisan nga malinawon ug hapsay ang eleksyon nga mahitabo sa Mayo 12, 2025. / AYB