Dul-an sa 500 ka ‘kriminal’ nasikop

Dul-an sa  500 ka ‘kriminal’ nasikop
SunStar Local News GPX

Dul-an sa 500 ka mga tawo nangasikop sa gilusad nga usa ka semana nga anti-criminality operations sa Police Regional Office 7 gikan sa Mayo 5 hangtod sa Mayo 11, 2024.

Nisangko kini sa pagkasakmit sa dul-an P33.6 milyunes nga balor sa ilegal nga drugas.

Sa talaan sa kapulisan sa Central Visayas, sila nakasakmit og dul-an sa lima ka kilo sa gituohang shabu nga dunay standard drug price nga P33,692,844.

Niini, sila nakasikop sa 151 ka high profile drug personalities sa tibuok rehiyon.

Sa ilang kampanya batok sa illegal gambling, sila nakasikop og 203 ka mga sugarol ug pagkasakmit sa kwarta nga balor og P23,227 isip sugal.

Samtang gihingusgan usab sa kapulisan ang kampanya batok loose firearms subay sa pagpangandam sa siguridad sa midterm elections sa sunod tuig, diin sila nakasakmit og 56 ka armas nga way lisensya ug pagka sikop sa 13 ka mga suspek.

Una na nga nimando si Police Brigadier General Anthony Aberin, hepe sa Police Regional Office 7, nga pakusgan pa ang ilang pagpangita sa wanted persons.

Sulod lang sa usa ka semana, nakasikop ang tanang units sa kapulisan og 126 ka wanted persons, 14 niini giila nga labing pinangita subay sa gibug-aton sa kaso nga iyang giatubang.

Ning nagkaduol ang dakong mga kalihukan sa Palarong Pambansa, gimandoan ni Abe­rin ang tanang polis nga mag monitor sa posibling pagpangabot sa lawless elements aron mohimo’g krimen sa mga bisita gikan sa lainlaing rehiyon sa Pilipinas. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph