Dul-an sa 800 ka mga polis sa Cebu City Police Office (CCPO) ang gipabantay sa sulod ug gawas sa Cebu City Sports Center (CCSC) atol sa free concert nga gidalit sa kagamhanan sa Dakbayan sa Sugbo kagabii, Enero 16, 2025.
Gibutyag ni Police Lieutenant Colonel Maria Theresa Macatangay Deputy City Director for Operation nga ila na kining gitun-an nga dili masusama sa nanglabay nga mga free concert sa CCSC nga nagubot ug hapit mag-stampede ang mga tawo nga nipugos sa pag sulod sa venue.
Ang tumong sa ticket aron mamonitor kon pila ka tawo ang makasulod sa CCSC ug kon mosobra na ang mga tawo ila na kining isirado apan mamahimo pa gihapon sila nga makasaksi pinaagi sa imontar nga dakong LED screen sa dalan Osmeña Boulevard.
Isirado sa Cebu City Transportation Office (CCTO) ang Osmeña Boulevard eskina RR. Landon aron makasaksi kadtong mga batan-on nga wala makakuha og ticket.
“Hopefully the viewing public will just cooperate with the security protocols that the PNP has implemented in the area so that we wont have any problem later and then they will all just gonna enjoy the show and the fun that gonna bring,” matod ni Macatangay.
Gipasalamatan sa kapulisan ang presensya sa Philippine Drug Enforcement Agency 7 nga mosusi sa mga tawo nga mosulod sa venue aron malikayan nga makalusot ang ilegal nga drugas.
Lakip sa ilang hugot nga gidili sa pagsulod sa CCSC mao ang mga ilimnon nga makahubog.
Tanan nga mga ilimnon nga dalhon sa mga manan-aw susihon sa kapulisan aron dili ni makalusot sa sulod tungod kay mamahimong dako kini nga problema kon dunay hubog nga masagol sa mga tawo. / AYB